உத்தரப் பிரதேசத்தை சேர்ந்த முன்னணி அரசியல் தலைவர் ஒருவர் ஆஞ்சநேயருக்கு சாதி சான்றிதழ் கேட்டு வாரணாசி மாவட்ட ஆட்சியாளரிடம் மனு கொடுத்தது பரபரப்பை கிளப்பியுள்ளது.
ராஜஸ்தான் சட்டப் பேரவை தேர்தலுக்கான பிரசாரம் நடைபெற்ற போது, கூட்டத்தில் பேசிய உத்தரப் பிரதேச முதல்வர் யோகி ஆதித்யநாத்,
ராமனுக்காக ஓய்வின்றி உழைக்க வேண்டி முடிவெடுத்த ஆஞ்சநேயர் ஒரு காட்டுவாசி. அவர் ஒரு தலித். வாக்களர்களும் அவரைப்போல முடிவெடுக்க வேண்டும்.
ராமர் பக்தர்கள் பாஜக-வுக்கு வாக்களியுங்கள். ராவணனை பின்பற்றுபவர்கள் காங்கிரஸுக்கு வாக்களிக்கட்டும் என்று பேசினார்.
இதற்கு பல தரப்பினர் கண்டனங்களை தெரிவித்தனர். கடவுள்களை சாதி ரீதியாக பாஜக பிரிக்கும் வேலையை தொடங்கிவிட்டதாக காங்கிரஸ் குற்றச்சாட்டை எழுப்பியது.
யோகி ஆதித்யநாத்தின் பேச்சு ஆஞ்சநேயர் பக்தர்களை காயப்படுத்திவிட்டதாக பல இந்து அமைப்பு தலைவர்கள் புகார் தெரிவித்தனர்.
தனது பேச்சுக்கு யோகி ஆதித்யநாத், ஆஞ்சநேயர் பக்தர்களிடம் மன்னிப்பு கேட்க வேண்டும் என்று கூறி ராஜஸ்தான் மாநில சர்வ பிராமண மகாசபை தலைவர் சுரேஷ் மிஸ்ரா, நோட்டீஸ் அனுப்பியுள்ளார்.
அதை தொடர்ந்து இந்த விவகாரத்தில் மேலும் சூட்டை கிளப்பினார் தேசிய பழங்குடியின தலைவர் நந்த் கிஷோர் சாய்.
ஒரு கூட்டத்தில் பேசிய அவர் ஆஞ்சநேயர் பழங்குடியினத்தை சேர்ந்தவர் தான், அவர் தலித்தல்ல என்று தெரிவித்திருந்தார்.
இது மேலும் சர்ச்சையை கிளப்பியது. இந்நிலையில் கடவுள் ஆஞ்சநேயருக்கு சாதி சான்றிதழ் கோரி வாரணாசி மாவட்ட ஆட்சியரிடம் மனு அளிக்கப்பட்டுள்ளது.
உத்தரப் பிரதேச முன்னாள் முதல்வர் முலயாம் சிங் யாதவின் தம்பி சிவபால் சிங் ’பிரகதிசீல் சமாஜ்வாடி’ என்ற கட்சியின் தலைவராக உள்ளார்.
இவர் தான் ஆஞ்சநேயருக்கு சாதி சான்றிதழ வழங்கக் கோரி விண்ணப்பம் செய்துள்ளார்.
இதுதொடர்பாக மனுவில் ஆஞ்சநேயரின் தந்தை மகராஜ் கேசரி என்றும், தாயார் அஞ்சனா தேவி என்றும்,
அவர் பிறந்தது வாரணாசி சங்கத் மோச்சன் என்றும், அவரது வயதை அளவிட முடியாது அதனால் பிறந்த வருடம் கண்டுப்பிடிக்க முடியாது என்று குறிப்பிடப்பட்டுள்ளது.
ஆஞ்சநேயருக்கு ஒரு வார காலத்திற்குள் சாதி சான்றிதழ் தரவில்லை என்றால்,
வாரணாசி மாவட்ட நிர்வாகத்திற்கு எதிராக போர்கொடி பிடிப்போம் என சிவபால் சிங் தனது மனுவில் எச்சரிக்கை விடுத்துள்ளார்.
