கர்நாடக சட்டப்பேரவைக்கு நாளை மறுநாள் வாக்குப்பதிவு நடைபெறவுள்ள நிலையில், இன்றுடன் தேர்தல் பரப்புரை நிறைவடைந்தது.
224 சட்டப்பேரவை கொண்ட கர்நாடகாவில், 223 தொகுதிகளுக்கு மட்டும் வாக்கு பதிவு நாளை மறுநாள் நடைபெறுகிறது. ஜெயநகர் தொகுதி பாஜக வேட்பாளர் காலமானதால் அந்த தொகுதிக்கு மட்டும் தேர்தல் ஒத்திவைக்கப்பட்டுள்ளது.
கர்நாடகாவில் காங்கிரஸ் மற்றும் பாஜக நேரடியாக களமிறங்கியுள்ள நிலையில், மாநில கட்சியான ஜேடிஎஸ் அந்த இரு பெரும் தேசிய கட்சிகளுக்கு வலுவான போட்டியை அளித்து வருகிறது.
தேர்தல் பரப்புரையின் இறுதி நாளான இன்று பாஜக சார்பில் பிரதமர் மோடி உட்பட 23 தலைவர்கள் இறுதிக்கட்ட பிரசாரத்தில் ஈடுபட்டனர். அப்போது பெங்களூருவில் பேசிய மோடி, காங்கிரஸ் கட்சியின் இதயத்தில் தலித்துகளுக்கும் பிற்படுத்தப்பட்ட வகுப்பினருக்கும் இடம் இல்லை என்று காட்டமாக விமர்சித்தார்.
பெங்களுருவில் செய்தியாளர்களை சந்தித்த காங்கிரஸ் தலைவர் ராகுல் காந்தி, பிரதமர் மோடி எனது தாய் சோனியா காந்தியின் மீது தனிமனித தாக்குதல் நடத்துவதன் மூலம் மகிழ்ச்சியாக உணர்கிறார் எனில், அவர் அதை தொடர்ந்து செய்யட்டும் என்று தெரிவித்தார்.
அடுத்தாண்டு நடைபெறும் மக்களவைத் தேர்தலுக்கான முன்னோட்டமாக கர்நாடாக சட்டப்பேரவை தேர்தல் அமைந்துள்ளது. 223 தொகுதிகளுக்கான வாக்குப்பதிவு வரும் 12ம் நடைபெற்று, 15ம் தேதி வாக்கு எண்ணிக்கை தொடங்கி அன்றே முடிவுகள் அறிவிக்கப்படவுள்ளது.
