வாடகைத்தாய் ஒழுங்குமுறையை வியாபார ரீதியா பயன்படுத்துவதற்கு தடை விதிக்கும் சட்ட மசோதா வியாழக்கிழமை மக்களவையில் நிறைவேற்றப்பட்டது.

கடந்த 2016ஆம் ஆண்டு நவம்பரில் வாடகைத்தாய் முறையை ஒழுங்குப்படுத்தும் மசோதா [Surrogacy (Regulation) Bill] மக்களவையில் அறிமுகம் செய்யப்பட்டது.

பின், 23 திருத்தங்கள் செய்யப்பட்ட இந்த மசோதா வியாழக்கிழமை மக்களவையில் விவாதிக்கப்பட்டது.

“இந்த மசோதா பெண்கள் மற்றும் குழந்தைகளின் கண்ணியத்தை பாதுகாக்கும். வாடகைத்தாய் முறையை வியாபார ரீதியில் பின்பற்ற தடை விதிக்கிறது.

இந்த மசோதாவின் நோக்கம், குடும்பங்களை காப்பாற்றுவதுதான்.” என மத்திய சுகாதாரத்துறை அமைச்சர் ஜே.பி.நட்டா பேசினார். பின் குரல் வாக்கெடுப்பு மூலம் மசோதா நிறைவேற்றப்பட்டது.

வாடகைத்தாய் முறையை பயன்படுத்திக்கொள்ளும் பெண்ணுக்கு 23 முதல் 50 வயதுக்குள் இருக்க வேண்டும்.

ஆணுக்கு 26 முதல் 55 வயதுக்குள் இருக்க வேண்டும். திருமணமாகி 5 ஆண்டுகள் கடந்திருக்க வேண்டும். தம்பதியரில் ஒருவருக்கு குழந்தை பெற தகுதி இல்லாமல் இருக்க வேண்டும்.

வாடகைத்தாயாக இருப்பவர் அந்த தம்பதிக்கு நெருக்கமான உறவினராக இருக்க வேண்டும். அவரும் திருமணமாகி குழந்தை பெற்றிருக்க வேண்டும்.

வியாபார ரீதியில் பணம் கொடுத்து வாடகைத்தாயாக அமர்த்தக்கூடாது. ஆனால், மருத்துவ செலவு, காப்பீட்டு செலவு போன்றவற்றை அவருக்குக் கொடுக்கலாம்.

இந்த மசோதாவுக்கு 2016ஆம் ஆண்டு ஆகஸ்டில் மத்திய அமைச்சரவை ஒப்புதல் வழங்கியது.

2017ஆம் ஆண்டு ஜனவரியில் சுகாதாரம் மற்றும் குடும்ப நலனுக்கான நாடாளுமன்ற நிலைக்குழுவிற்கு அனுப்பப்பட்டது