தேசிய ஐயப்ப பக்தர்கள் சார்பில், சபரிமலையில் அனைத்து வயது பெண்களையும் அனுமதிக்கும் தீர்ப்புக்கு எதிர்ப்பு தெரிவித்து உச்சநீதிமன்றத்தில் சீராய்வு மனு தாக்கல் செய்யப்பட்டுள்ளது.
சபரிமலையில் அனைத்து வயது பெண்களையும் அனுமதிக்க உத்தரவு பிறப்பித்து, டெல்லி உச்சநீதிமன்றம் பரபரப்பு தீர்ப்பை வழங்கியது. இதற்கு ஆதரவும், விமர்சனமும் ஒருங்கே எழுந்துள்ளது.
இந்நிலையில், உச்சநீதிமன்றத்துக்கு எதிராக சபரிமலை ஐய்யப்பன் கோயிலின் பாரம்பரிய வழிபாட்டு முறைய பாதுகாக்க வலியுறுத்தி கேரளாவின் பல்வேறு பகுதிகளில் பக்தர்கள் பேரணி நடத்தினர். இதில் ஏராளமானோர் பங்கேற்றனர்.
இது கேரள மாநில அரசுக்கு நெருக்கடியை ஏற்படுத்தியுள்ளது. இந்த பிரச்னைக்கு தீர்வு காணும் வகையில் முதலமைச்சர் பினராயி விஜயன் திருவனந்தபுரத்தில் சமரசம் பேச முயற்சி எடுத்து வருகிறார். அதன்படி பந்தள அரச குடும்பத்தினருக்கு அழைப்பு விடுக்கப்பட்டது.
ஆனால் இதில் கலந்து கொள்ளப்போவதில்லை என்று அரச குடும்பத்தினரும், ஐயப்பன் கோயில் தந்திரியும் தெரிவித்து உள்ளனர். இருந்தாலும் தொடர்ந்து முதல்வர் பினராயி விஜயன் தரப்பிலிருந்து சமரசம் பேச முயற்சிகள் மேற்கொள்ளப்பட்டு வருகின்றன.
இந்த நிலையில் சபரிமலையில் அனைத்து வயது பெண்களையும் அனுமதிக்கும் தீர்ப்பை எதிர்த்து உச்சநீதிமன்றத்தில் சீராய்வு மனு இன்று காலை தாக்கல் செய்யப்பட்டு உள்ளது.
தேசிய ஐயப்ப பக்தர்கள் சங்கம் சார்பில் அதன் தலைவர் ஷியாலாஜா விஜயன் இந்த சீராய்வு மனுவை தாக்கல் செய்து உள்ளார். மனுவில் அரசியல் சாசனத்திற்கு எதிராக தீர்ப்பு வழங்கப்பட்டு உள்ளதாக கூறப்பட்டு உள்ளது.
