முக்கிய செய்திகள்

மணல் குவாரிகளை மூடும் உத்தரவுக்கு உச்சநீதிமன்றம் தடை


மணல் குவாரிகளை 6 மாதத்தில் மூடவேண்டும் என்று சென்னை உயர்நீதிமன்றத்தின் மதுரைக்கிளை பிறப்பித்த உத்தரவுக்கு உச்சநீதிமன்றம் இன்று இடைக் கால தடை விதித்துள்ளது.

கடந்தாண்டு நவம்பர் மாதம் சென்னை உயர் நீதிமன்றத்தின் மதுரை கிளை மணல் குவாரிகளை 6 மாதத்திற்குள் மூட வேண்டும் என்று உத்தரவு பிறப்பித்து இருந்தது. “தமிழகத்தில் உள்ள அனைத்து மணல் குவாரிகளையும் 6 மாதத்துக்குள் மூட வேண்டும். புதிதாக மணல் குவாரி திறக்கக்கூடாது. தேவைக்கேற்ப, வெளிநாட்டில் இருந்து மாநில அரசே மணலை இறக்குமதி செய்து விற்கலாம்” என்று நீதிமன்ற உத்தரவு.பிறப்பித்தது.

வெளிநாட்டில் இருந்து இறக்குமதி செய்துள்ள மணலை விற்க அனுமதி வழங்க வேண்டும் என்று எம்.ஆர்.எம். ராமையா என்பவர் தாக்கல் செய்த மனுவை விசாரித்த உயர்நீதிமன்றம் இந்த உத்தரவைப் பிறப்பித்து இருந்தது. கடந்தாண்டு டிசம்பர் மாதம் இந்த உத்தரவை நீதிபதி மகாதேவன், வழங்கியிருந்தார்.

இந்த உத்தரவை எதிர்த்து சென்னை உயர்நீதிமன்ற 2 நீதிபதிகள் அமர்வில் தமிழக அரசு மேல்முறையீடு செய்தது. நீதிபதி கல்யாணசுந்தரம், தாரணி அமர்வு முன்பு இந்த வழக்கு விசாரணைக்கு வந்தது. அப்போது ஒரு நீதிபதியின் உத்தரவை உறுதி செய்து அரசின் மேல்முறையீட்டு மனுவை தள்ளுபடி செய்தனர். இந்த நிலையில் சென்னை உயர்நீதிமன்றத்தின் உத்தரவை எதிர்த்து தமிழக அரசு உச்சநீதிமன்றத்தில் மேல்முறையீடு செய்தது.