கருணாநிதியை தமிழக தலைவராக மட்டும் பார்க்க வேண்டாம், அவர் ஒரு தேசிய தலைவர் என்று மத்திய அமைச்சர் நிதின் கட்கரி புகழாரம் சூட்டியுள்ளார்.
சென்னை நந்தனத்தில் உள்ள ஒய்எம்சிஏ மைதானத்தில் மறைந்த திமுக தலைவர் கருணாநிதிக்கு நினைவேந்தல் கூட்டம் இன்று மாலை நடைபெற்றது.
இதில் மத்திய அமைச்சர் நிதின் கட்கரி கலந்து கொண்டார். அவர் பேசியதாவது,’மத்தியில் காங்கிரஸ் ஆட்சியின் போது அவசரநிலை பிரகடனம் வந்தது. அப்போது, திமுகவும் பாரதிய ஜனசங்கமும் தான் அதை எதிர்த்து குரல் கொடுத்தன. கருணாநிதி தமிழக்திற்கு மட்டுமல்ல இந்தியாவுக்கே தலைவர்.
அவருக்காக நாடாளுமன்றத்தில் இரு அவைகளும் ஒத்தி வைக்கப்பட்டன. இந்திய வரலாற்றிலேயே, நாடாளுமன்ற உறுப்பினராக இல்லாத ஒருவருக்கு அவை ஒத்தி வைக்கப்பட்டது இதுவே முதன் முறை.
இது ஒரு சரித்திர நிகழ்வு. தலைவர் கருணாநிதி வாஜ்பாயுடன் இணைந்து தேசத்துக்கு முக்கிய பங்காற்றியுள்ளார்.
1971 ம் ஆண்டு தமிழகம் வெள்ளத்தால் பாதிக்கப்பட்டது. அப்போது, திமுக எம்பி.,க்கள் நாடாளுமன்றத்தில் குரல் கொடுத்தனர். திமுகவினரின் குரலுக்கு வாஜ்பாய் ஆதரவு கொடுத்தார்.
இப்போது கருணாநிதியும் இல்லை வாஜ்பாயும் இல்லை. இரு பெரும் மகான்களும் அடுத்தடுத்து நம்மை விட்டு சென்றுவிட்டனர்.
அரசியல் மட்டுமிலாது, கலை, திரைத்துறை, இலக்கியம், நாடகம், பத்திரிகை என அனைத்துத் துறைகளிலும் தனி முத்திரை பதித்தவர் கருணாநிதி. அவர் வாழ்நாள் முழுவதும் ஓய்வின்றி உழைத்தவர் என்று தான் கூற வேண்டும்’.
