கோலாலம்பூர் : தேசம் ஊடக சாதனையாளர்கள் விருதளிப்பு விழா 2021/2022, கடந்த ஞாயிற்றுக்கிழமை, பத்துகேவ்ஸ், ஷென்கா கான்வென்ஸன் மாநாட்டு மண்டபத்தில் வெகுசிறப்பாக நடைபெற்றது. தேசம் குணாளன் மணியம் ஏற்பாட்டில் நடைபெற்ற இந்த மாபெரும் விழாவிற்கு மஇகா தேசிய துணைத் தலைவரும், மனித வள அமைச்சருமான டத்தோஸ்ரீ எம். சரவணன் தலைமையேற்றார்.
இந்த விருதளிப்பு விழாவில் தமிழ்ப்பத்திரிகை துறையின் மூத்த புகைப்படக்கலைஞர் பி. மலையாண்டி கெளரவிக்கப்பட்டார். அவருக்கு, மனித வள அமைச்சர் டத்தோஸ்ரீ சரவணன் கேடயம் மற்றும் நற்சான்றிதழ் வழங்கி சிறப்பு செய்தார்.
தமிழ்ப்பத்திரிகை துறையில் கடந்த 45 ஆண்டு காலமாக பணியாற்றி வரும் பி. மலையாண்டியின் சாதனையை அங்கீகரிக்கும் வகையில் இந்த விருது வழங்கப்பட்டது. குற்றவியல், நீதிமன்றம், நாடாளுமன்றம், அரசியல், சமூகவியல், விளையாட்டு உட்பட செய்தித் துறையில் பரந்த அனுபவத்தை கொண்டவரான பி. மலையாண்டி, தமிழ்மலர், தினமணி, மலேசிய நண்பன் ஆகிய நாளிதழ்களில் பணியாற்றியிருப்பதுடன் மக்கள் ஓசையில் தமது சேவையை வழங்கி வருகிறார் என்பது குறிப்பிடத்தக்கது.